Wir sindt doch nuhmer gantz / ja mehr den gantz verheret!
Der frechen völcker schaar / die rasende posaun
Das vom blutt fette schwerdt / die donnernde Carthaun
Hatt aller schweis / und fleis / und vorraht auff gezehret.
Die türme stehn in glutt / die Kirch ist umbgekehret.
Das Rahthaus ligt im graus / die starcken sind zerhawn.
Die Jungfrawn sindt geschändt / und wo wir hin nur schawn
Ist fewer / pest / und todt der hertz undt geist durchfehret.
Hier durch die schantz und Stadt / rint alzeit frisches blutt.
Dreymall sindt schon sechs jahr als unser ströme flutt
Von so viel leichen schwer / sich langsam fortgedrungen.
Doch schweig ich noch von dem was ärger als der todt.
Was grimmer den die pest / undt glutt undt hungersnoth
Das nun der Selen schatz / so vielen abgezwungen.
