Walther von der Vogelweide:
Ich saz ûf eime steine
Ich saz ûf eime steine,
und dahte, bein mit beine:
dar ûf satzt ich den ellenbogen:
ich hete in mine hant gesmogen
daz kinne und ein min wange.
dô dâhte ich mir vil ange,
wie man zur welte solte leben:
deheinen rât kond ich gegeben,
wie man driu dinc erwurbe,
der keines niht verdurbe.
diu zwei sint êre und varnde guot,
daz dicke ein ander schaden tuot:
daz dritte ist gotes hiulde,
der zweier übergulde.
die wolte ich gerne in einen schrîn.
ja leider desn mac niht gesîn,
daz guot und weltlich êre
und gotes hulde mêre
zesamene in ein herze komen.
stîg unde wege sint in benomen:
untriuwe ist in der sâze,
gewalt vert ûf der straze:
fride unde reht sind sêre wunt.
diu driu enhabent geleites niht,
diu zwei enwerden ê gesunt.
